“Qarabağ”la oyun ərəfəsində “Napoli”nin heyət problemi dərinləşir

“Napoli”nin Çempionlar Liqasının növbəti turunda “Qarabağ”a qarşı keçirəcəyi oyunda daha üç futbolçunun iştirak etməyəcəyi bəlli olub.

Sport1.az İtaliya mediasına istinadən xəbər verir ki, Leonardo Spinazzola, Billi Gilmur və Romelu Lukaku Neapoldakı qarşılaşmada meydana çıxmayacaq.

Spinazzola və Gilmur hazırda fərdi bərpa prosesindədir və yaxın günlərdə komanda məşqlərinə qoşulmaları gözlənsə də, nə A Seriyasında “Atalanta” ilə oyuna, nə də Çempionlar Liqasındakı “Qarabağ” matçına qədər hazır olmaları real görünmür. Lukakunun isə noyabrın 30-da “Roma” ilə matçda dönə biləcəyi bildirilir.

Bununla yanaşı, Romelu Lukaku ümumiyyətlə Çempionlar Liqası üçün iştirak ərizəsinə daxil edilməyib, bu səbəbdən onun “Qarabağ” qarşılaşmasında oynamaq imkanı yoxdur.

Daha əvvəl qapıçı Aleks Meret, yarımmüdafiəçilər Andre Zambo-Anqissa və Kevin De Bröynenin də zədə səbəbindən matçı buraxacağı açıqlanmışdı.

Qeyd edək ki, “Napoli” – “Qarabağ” görüşü noyabrın 26-da Neapoldakı “Dieqo Armando Maradona” stadionunda keçiriləcək.