Argentinada polis futbolçulara qarşı bibər qazından istifadə edib

Argentina birinci liqasına yüksəlmək uğrunda pley-off yarımfinalında “Deportivo Madrin” ilə “Deportivo Moron” arasında keçirilən görüşdən sonra meydanda ciddi gərginlik yaşanıb.

Sport1.az xəbər verir ki, ev sahibi komanda 1:0 hesabı ilə qalib gəldikdən sonra qonaqların futbolçuları baş hakim Pablo Eçavarrianın qərarlarına etiraz ediblər. Xüsusilə qola səbəb olan cərimə zərbəsinin mübahisəli olması narazılığı daha da artırıb.

Hakimə yönələn etirazlara qonaq komandanın məşqçiləri və bəzi azarkeşlər də qoşulub və meydanda vəziyyət nəzarətdən çıxıb. Gərginliyi sakitləşdirmək üçün polis müdaxilə edib, qalxan və bibər qazından istifadə edilib.

Qeyd edək ki, “Deportivo Madrin” pley-off finalında “Estudyantes Rio Kuarto” ilə qarşılaşacaq.