Ançelotti Modriçin sirrini açdı: “Real”da məşq buraxmayan yeganə futbolçu idi”

Braziliya millisinin baş məşqçisi Karlo Ançelotti 40 yaşlı Luka Modriçin bu səviyyədə futbol oynamasının sirrini açıqlayıb.

Sport1.az xəbər verir ki, italyan mütəxəssis təcrübəli yarımmüdafiəçinin yüksək performansını həm peşəkar yanaşması, həm də fiziki xüsusiyyətləri ilə əlaqələndirib. O, Modriçin ötən mövsüm “Real”da çalışdığı müddətdə bir məşqi belə buraxmadığını qeyd edib:

“Lukanın hələ də ən yüksək səviyyədə çıxış etməsi məni təəccübləndirmir. Onun hədəfi Dünya Çempionatıdır və buna görə də özünə nümunəvi yanaşır. Keçən mövsüm mənim “Real”ımda məşqləri buraxmayan yeganə futbolçu o idi”.

Ançelotti Modriçin “Milan”da həftədə bir oyun ritmində rahatlıqla öz səviyyəsini qoruduğunu vurğulayıb:

“Bunun sirri sadədir - genetika və ciddi peşəkarlıq. Luka hələ də dünyanın ən yaxşı yarımmüdafiəçilərindən biridir. Onun haqqında yeni müqavilə danışıqlarının aparıldığını oxudum və düşünürəm ki, heç bir çətinlik olmadan daha bir il oynaya bilər”.

Qeyd edək ki, Luka Modriç ötən yay “Real”dan ayrıldıqdan sonra “Milan”la müqavilə imzalayıb.