Tramp “Tottenhem”in sabiq sahibini əfv etdi
ABŞ prezidenti Donald Trampın sərəncamı ilə İngiltərənin “Tottenhem” klubunun sabiq sahibi Co Luis bağışlanıb.
Sport1.az xəbər verir ki, Daily Mail-in məlumatına görə, 88 yaşlı milyarder daha əvvəl daxili məlumatlardan istifadə edərək səhm alqı-satqısı ilə bağlı ittiham olunmuş və şərti cəza almışdı. O, həmçinin 3,8 milyon funt-sterlinq (təxminən 4,3 milyon avro) məbləğində cərimələnmişdi. İttiham edilən əməliyyatların 2013–2021-ci illər arasında baş verdiyi bildirilib və həmin dövr iş adamının “Tottenhem”in idarə olunmasında aktiv rol aldığı müddətə təsadüf edir.
2022-ci ildə klubun sahiblik strukturunda dəyişiklik edilib və Co Luis nəzarət paketini ailə üzvlərinə ötürüb. Hazırda “Tottenhem”in idarəçiliyi tam şəkildə onun qızı, oğlu və kürəkəni tərəfindən həyata keçirilir.
