San-Marino DÇ-2026-ya vəsiqə qazana bilər: Rumıniyaya böyük hesabla məğlub olmalıdırlar

San-Marino millisi bütün gözləntilərə rəğmən, DÇ-2026-ya yollanmaq şansını hələ də itirməyib.

Sport1.az xəbər verir ki, bu qeyri-adi ehtimal yığmanın Millətlər Liqasının D divizionunu lider kimi tamamlaması ilə bağlıdır. Hazırda FIFA reytinqində sonuncudan bir pillə yuxarıda – 210-cu yerdə qərarlaşan komanda seçmə mərhələnin H qrupunda keçirdiyi 9 oyunda xal toplaya bilməyib və sonuncu sıradadır.

Buna baxmayaraq, mümkünsüz görünən bir ssenari var ki, reallaşarsa, Roberto Çevolinin komandası pley-off mərhələsinə yüksələ bilər. Bunun üçün 18 noyabrda Rumıniya ilə keçiriləcək qarşılaşmada böyük hesabla məğlub olmaları onlara sərf edir. Rumıniyanın qələbəsi qrupda ikinci pillənin dəyişməsinə səbəb olacaq və Millətlər Liqasından gələn pley-off yerlərinin bölgüsünə təsir göstərə bilər.

Bu hesablamanın işləməsi üçün daha iki nəticə də vacibdir: Şimali İrlandiya 14 noyabrda Slovakiyanı, Rumıniya isə 15 noyabrda Bosniya və Herseqovinanı məğlub etməlidir. Bu hadisələr baş verərsə, San-Marino digər divizion qalibləri kimi pley-off xəttində yerini qorumaq şansı əldə edəcək və tarixində ilk dəfə Dünya Çempionatına yaxın düşəcək.

Qeyd edək ki, Avropa zonası üzrə pley-off oyunları 2026-cı il martın 26-da və 31-də keçiriləcək.