Təcrübəli mütəxəssisdən Ayxan Abbasova məsləhət - AÇIQLAMA
Azərbaycan yığmasının İslandiya və Fransa seçmələri ilə oyunlar üçün heyətində 4 qapıçı var.
Əsas qolkiper Şahruddin Məhəmmədəliyev sarı vərəqə limitinə görə ilk oyunu buraxacaq. Sual olunur “Qarabağ”ın qapıçısının yoxluğunda hansı “əlcək sahibi”nə çərçivədə şans veriləcək?
Suallarımızı Nadir Şükürova ünvanladıq. Mütəxəssis Sport1.az-a açıqlamasında mövzu ilə bağlı bunları söylədi:
“Təbii ki, bu barədə əsas fikir sahibləri millidə yer alan məşqçilər korpusuna məxsusdur. Onlar kimi məsləhət bilsələr, ona da şans veriləcək. Məncə, qapıçı təcrübəsi çox olan və çempionat matçlarında da oyun praktikasından əziyyət çəkməyən “əlcək sahibi”nə şans verilsə, yaxşı olar. Uzun müddətdən sonra Səlahət Ağayevin yığmaya çağrılması xoş haldır. Bu münasibətlə onu təbrik edirəm. Səlahət uzun müddət ölkənin əsas komandasının “1 nömrə”si olub. Kifayət qədər təcrübəsi var. O, “Qəbələ”nin heyətində arxada qalan 11 Premyer Liqa matçının da hamısında qapını qoruyub. Düşünürəm ki, təcrübəli Səlahətə şans verilsə, məntiqli və ədalətli olar. Çünki digər qapıçılar öz klublarında oyun praktikasından əziyyət çəkirlər. İstənilən halda son qərarı məşqçilər korpusu verəcək”.
MİRZƏ S.
