Endrikin gələcəyi: Ançelotti qərarın düsturunu dedi
Braziliya millisinin baş məşqçisi Karlo Ançelotti gənc hücumçu Endrikə gələcəyi ilə bağlı məsləhət verib.
Sport1.az xəbər verir ki, təcrübəli mütəxəssis 19 yaşlı futbolçuya klub rəhbərliyi ilə açıq danışmağı və bütün variantları diqqətlə dəyərləndirməyi tövsiyə edib. Son günlər Endrikin oyun praktikasının azlığı səbəbindən “Real Madrid”dən icarəyə getmək istədiyi və bu addımla DÇ-2026 öncəsi əsas heyət şansını artırmağı planlaşdırdığı bildirilir.
“Endrik hər şeyi “Real Madrid”lə birlikdə müzakirə etməlidir. O, çox gəncdir. DÇ-2026 onun üçün son olmayacaq. Əlbəttə, bu turnirdə oynaya bilər, çünki artıq lazımi keyfiyyətlərə malikdir. Amma o, 2030 və 2034-cü illərdə də Dünya Çempionatlarında iştirak edə bilər. Hətta, bəlkə də, 2038-də belə”, – deyə Ançelotti bildirib.
Qeyd edək ki, Endrikin Madrid təmsilçisi ilə müqaviləsi 2030-cu ilə qədər qüvvədədir. O, cari mövsümdə “Real”ın heyətində yalnız bir oyunda meydana çıxıb, ötən mövsümdə isə 37 matçda 7 qolla yadda qalıb.
