"Qarabağ"ın rəqibində baş məşqçi böhranı

“Napoli”də baş məşqçi dəyişikliyi gündəmdədir.

Sport1.az xəbər verir ki, italiyalı jurnalist Matteo Morettonun məlumatına görə, komandanın çalışdırıcısı Antonio Konte klubdan ayrılmaq qərarına gələ bilər. Məsələ onun klub prezidenti Aurelio de Laurentis ilə görüşündən sonra dəqiqləşəcək.

Görüşün noyabrın 10-da keçirilməsi planlaşdırılır. Tərəflər Konte ilə bağlı gələcək planları və mövsümün gedişatını müzakirə edəcəklər.

İtaliyalı mütəxəssis “Napoli”yə 2024-cü ilin iyulunda baş məşqçi təyin olunub. Onun rəhbərliyi altında neapollular ötən mövsüm İtaliya çempionu olublar. Yayda Konte komandadan ayrılmaq istəsə də, rəhbərlik onu fikrindən daşındırmışdı. Hazırda “Napoli” A Seriyasında 22 xalla 4-cü pillədə qərarlaşıb və liderdən cəmi iki xal geri qalır.

Qeyd edək ki, “Napoli” “Qarabağ”ın Çempionlar Liqasındakı rəqiblərindən biridir. Bu komandalar arasında görüş noyabrın 26-da, Bakı vaxtı ilə saat 00:00-da “Dieqo Armando Maradona” stadionunda baş tutacaq.