“Qalatasaray”dan Messi iddialarına cavab: "Mümkündür"

“Qalatasaray” prezidenti Dursun Özbek Lionel Messinin “İnter Mayami”dən qısa müddətli icarə ilə transfer olunacağı barədə yayılan iddialara münasibət bildirib.

Sport1.az xəbər verir ki, təcrübəli funksioner “The Touchline” nəşrinə açıqlamasında bu cür danışıqların artıq reallığa çevrilə biləcəyini deyib:

“Qalatasaray” elə bir səviyyəyə çatıb ki, artıq bu tip danışıqlar belə mümkündür. Biz planı çox yüksəyə qaldırmışıq. Üç mövsümdür ardıcıl çempion olan komandanın əsas heyətini qorumağı bacardıq. Bütün addımlarımız maliyyə imkanlarımız çərçivəsindədir. Elə buna görədir ki, indi bizdən Messi haqqında soruşurlar”.

Bildirilir ki, İstanbul təmsilçisi ulduz futbolçu ilə MLS-də mövsümlərarası fasilə dövrü üçün dörd aylıq icarə müqaviləsi bağlamaq istəyir. ABŞ çempionatında əsas mərhələ oktyabrda başa çatır, pley-off isə dekabrın əvvəlinə qədər davam edir.

Qeyd edilir ki, məhz bu fasilə Messinin “Qalatasaray”a keçməyə razı olmasına səbəb ola bilər. Argentinalı hücumçu 2026-cı il Dünya Çempionatı öncəsi oyun praktikasını qorumağı planlaşdırır.

Xatırladaq ki, MLS-in növbəti mövsümü 2026-cı ilin martında start götürəcək.