ÇL oyunu zamanı futbolçunun evi qarət olundu

“İnter”in müdafiəçisi Alessandro Bastoninin evi komandasının “Kayrat”la keçirdiyi Çempionlar Liqası oyunu (2:1) zamanı qarət edilib.

Sport1.az xəbər verir ki, “La Gazzetta dello Sport”un məlumatına görə, 26 yaşlı futbolçu “San Siro” stadionunda olarkən onun Kastelli-Kalepyo şəhərindəki evinə azı dörd nəfərdən ibarət dəstə daxil olub. Qarətçilər brend çantalar və “Rolex” markalı saatlar da daxil olmaqla bir neçə qiymətli əşyanı oğurlayıblar.

Hadisə zamanı evdəki siqnalizasiya işə düşüb və bu, oğruların tələsik evi tərk etməsinə səbəb olub. Onlar mühafizə xidməti və polis gəlməmiş hadisə yerindən uzaqlaşıblar. Hazırda istintaqçılar evin və ətraf ərazinin müşahidə kameralarındakı görüntüləri araşdırırlar.

Qeyd edək ki, Alessandro Bastoni həmin qarşılaşmanı ehtiyat oyunçular skamyasından izləyib.