Messi gələcəyi barədə: “Biznes əlaqələrimi inkişaf etdirəcəyəm”

“İnter Mayami” klubunun hücumçusu Lionel Messi peşəkar karyerası və gələcək planları barədə danışıb.

Sport1.az xəbər verir ki, 38 yaşlı argentinalı ulduz Mayamidə keçirilən biznes-konfransında çıxışı zamanı hələ futbolu buraxmaq barədə düşünmədiyini bildirib:

“Bu, indiyə qədər çox düşündüyüm və ya narahat olduğum bir məsələ olmayıb. Karyeramı başa vurduqdan sonra illər keçdikcə etdiklərimin və qazandıqlarımın dəyərini daha çox anlayacağam. Amma indi sadəcə oynamaqdan və bu oyundan zövq almaqdan həzz alıram”.

Messi əlavə edib ki, futbol karyerası bitdikdən sonra yeni sahələrdə öyrənmək və biznes əlaqələrini inkişaf etdirmək niyyətindədir:

“Təəssüf ki, bir gün futbol həyatı sona çatır. Mən isə öyrənməyə davam etmək istəyirəm. Qarşıda məni fərqli bir mərhələ, fərqli bir dünya gözləyir və mən tədricən ora daxil oluram”.

Qeyd edək ki, bu mövsümdə Messi bütün turnirlərdə 38 oyuna çıxaraq 35 qol vurub və 18 assist edib. Ulduz futbolçu yeni müqaviləyə əsasən 2028-ci ilin sonunadək MLS təmsilçisində çıxış edəcək.