“Topçular”ın tarixə düşən addımı

“Arsenal”ın gənc istedadı Maks Dauman cəmi 15 yaş 308 günlüyündə meydana çıxaraq UEFA Çempionlar Liqası tarixinin ən gənc futbolçusu adını qazanıb.

Sport1.az xəbər verir ki, ingiltərəli yarımmüdafiəçi “Slaviya” ilə səfər oyununda (3:0) 72-ci dəqiqədə Yurien Timberi əvəzləyib. Bununla da o, 2020-ci ildə “Borussiya Dortmund”un oyunçusu Yussufa Mukokoya (16 yaş 18 gün) məxsus olan rekordu yeniləyib.

Dauman həmçinin “Barselona”nın gənc ulduzu Lamin Yamaldan (16 yaş 68 gün) da daha gənc yaşda Çempionlar Liqasında debüt edib.

“Arsenal”ın baş məşqçisi Mikel Arteta bu istedadlı futbolçunun yetkin oyun tərzini və soyuqqanlı davranışını xüsusi qiymətləndirib. Dauman avqust ayında Premyer Liqada “Lids”ə qarşı keçirilən (5:0) görüşdə də debüt edərək turnirin ikinci ən gənc futbolçusu olmuşdu.

Hazırda 11-ci sinifdə təhsil alan Maks Dauman dərslərini klubun təlim-məşq bazasında davam etdirir və səfərlərdə təhlükəsizlik əməkdaşı tərəfindən müşayiət olunur.