Gözümüzə fərqli görünən "Qarabağ" - KÖŞƏ

“Qarabağ” sabah Bakıda “Çelsi” ilə qarşılaşacaq. Böyük matç ərəfəsində komanda daxilindəki atmosfer az da olsa fərqli görünür. Son oyunlarda baş məşqçi Qurban Qurbanovun əvvəlki sakit və təmkinli davranışlarından uzaqlaşaraq daha aqressiv və əsəbi göründüyü müşahidə edirik.

"İmişli" ilə görüşdən sonra "Qarabağ"ın oyunçuları ortalıqda yox idilər. Futbolçulardan yalnız Kadi Borges jurnalistlərin qarşısına çıxdı, qalanları isə müsahibə verməkdən imtina etdilər. Elə bil Kadi braziliyalı gözdən pərdə asmaq üçün media nümayəndələrinin önünə atılmışdı. Hətta “Çelsi” ilə bağlı verilən bir-iki sualdan sonra onun gərginləşdiyini gördük. "Bu günkü oyunla bağlı sual verin” deyərək həyacanını ört-basdır etdi.

Meydanda da bu hal diqqətdən qaçmır. Qurbanov son qarşılaşmalarda futbolçulara tez-tez qışqırır, bəzən emosiyalarını saxlaya bilmir. Onun bu halı azarkeşlər arasında da müzakirə olunur. “Qarabağ”da sakitliyi və soyuqqanlığı ilə seçilən məşqçini belə görmək bir az təəccüblüdür.

Bəlkə də bu aqressiya gərginliyin deyil, məsuliyyətin göstəricisidir. Amma istənilən halda, “Qarabağ”ın bütün uğurlarında uğurunda Qurban Qurbanovun sakitliyi və soyuqqanlılığı gözə çarpan məqam olub.

MİKAYIL HACIYEV