Azərbaycan futbolu kimi xaraba günə qalan Zabrat stadionu - YAZI

Yaşadığım Zabratda yaxşı futbol ənənələri və stadionu var idi.

Demək olar ki, bütün qəsəbə o arenada futbol oynayırdı. Bir neçə yaxşı futbolçu məhz o stadiondan çıxmışdı. Zabratda yaşayan hamı kimi mən də futbol oynayırdım və gələcəyə dair ümidlərim, planlarım var idi. Sonra olanları isə Azərbaycandakı yüzlərlə, minlərlə gənc yaşayıb.

Məni Azərbaycanda futboldan illər öncə Fuad Musayev və Lipa İslam Kərimov iyrəndirmişdi (hər iki şəxsi hamı tanıyır). O Fuad Musayev ki, AFFA prezidenti olaraq "Şəfa"nın çempion olması üçün "Xəzər Universiteti"nin haqqını yedi. Azərbaycan futboluna böyük zərbə vurdu. O Lipa İslam ki, mənim haqqım olduğu halda pul alıb, yerimə başqasını oynatdı.

Sonralar "Xəzər Universiteti" "İnter" adlandı. Doğuşundan, böyüməsinə kimi Zabratda olan bu klub, məşqlərini, oyunlarını məhz burada keçirirdi. Yağış yağıb, stadionu su basanda bütün qəsəbə sakinləri vedrə ilə suyu təmizləyirdi ki, klubumuz oynasın. O Zabratda ki, Eldarın və digərlərinin sayəsində "İnter"in fan-klubu yarandı. Üzvlərinin hamısı qəsəbə uşaqları idi. O Zabratda ki, kapitanı doğulub, məşq edib, futbolçu olmuşdu. O Zabratda ki, "İnter" "Şəfa" stadionuna köçəndən sonra belə qəsəbənin uşaqları avtobuslarla ölkənin istənilən yerinə dəstəyə getdi. Amma "İnter"in adı dəyişərək "Keşlə" oldu. Daha sonra isə "Şamaxı"ya çevrildi. Ayrı seçkilik salmıram. Bəs, bizim - zabratlıların əziyyəti, haqqı necə oldu? Niyə klubun adı yarandığı yer olan "Zabrat" olmadı? Niyə "Keşlə"? Niyə "Şamaxı"? Olmazdı ki, komanda Zabratda qalardı? "Keşlə" və "Şamaxı" adda başqa klub yaratmaq belə çətin idi? Zabratlı və futbolçu olaraq həmin günlər yenidən Azərbaycan futbolundan iyrəndim. Haqqımızı halal etmirik!


Hə, bu arada Zabratdakı stadion artıq kimsə tərəfindən özəlləşdirilib və hasarlanıb. Artıq futbolun üzünə bağlıdır. Azərbaycan futbolu kimi Zabrat stadionu da xaraba günə qalıb.