"Qəbələ"yə qayıdan Elvin Camalov: "BUNA MƏCBUR QALDIM"

Həmin qarşılaşmadan sonra "qırmızı-qaralar"ın yeni transferi Elvin Camalov sualları cavablandırıb.

Sport1.az bölgə təmsilçisinin futbolçusunun müsahibəsini təqdim edir:

- Bu, mənim üçün önəmli oyun oldu. Çoxdandır oyun praktikam azalmışdı. "Neftçi"də az şans qazanırdım. Ona görə də belə bir qərar verdim. Əlbəttə, "Neftçi"dən ayrılmaq çox üzücü idi. O kluba, azarkeşlərinə və bütün əməkdaşlarına böyük hörmətim var. Sadəcə, çox şans qazana bilmədiyimdən, ayrılmaq məcburiyyətində qaldım. Daha çox oynamaq istəyirdim. Çünki karyeramın elə bir mərhələsindəyəm ki, oynamasaydım, karyeramı bitirməyə, necə deyərlər, uçuruma doğru gedirdim. Bir il də belə otursaydım, düşünürəm ki, karyeramı bitirəcəkdim və ya təkliflər az gələcəkdi. Ona görə də belə bir qərar verdim. "Neftçi"ni qələbə münasibətilə təbrik edir və komandaya uğurlar arzulayıram.

- "Qəbələ" mənim üçün yad komanda deyil. Bura mənə doğmadır, bu klubun futbolçu karyeramda çox önəmli yeri var. Bura gəlməyi də özümə borc bildim.

- Düşünürəm ki, yaxşı oyun alındı. Komanda olaraq yaxşı oynadıq. Sadəcə, "Neftçi" elə komandadır ki, gərək əlinə düşən fürsətlərdən yararlanasan. Biz bundan istifadə edə bilmədik. "Neftçi" isə keyfiyyətli futbolçulardan ibarət komandadır və yaranan fürsətlərdən yararlandılar. Sonda komandamızda bir qədər yorğunluq hiss olunurdu və buna görə məğlub olduq.

- Düşünürəm ki, öz üzərimizdə işləməliyik. Daha çox gənclərdən ibarət komandamız var. Daha çox çalışıb, daha çox bir-birimizi tanıdıqdan sonra yaxşı nəticələr qazanacağımıza inanıram. Yeni baş məşqçimiz də gəlib.

- "Neftçi"də daha az şans qazandığım üçün belə qərar verdim. Həm də "Qəbələ" mənim qayıdışıma hər zaman isti yanaşıb. Kaxaber Tsxadadzenin baş məşqçi olduğu vaxt da komandaya dönməyimi istəyirdilər. İki variantım var idi və mən "Qəbələ"ni seçdim. Düşündüm ki, burada daha çox şans qazanar, daha çox oynayaram. Mənə inandılar, gələn kimi ilk "11-lik"də yer aldım. Ümid edirəm ki, gələcəkdə onların inamlarını doğruldaram.

- "Neftçi"yə keçəndə necə bir komandaya getdiyimi, necə azarkeşlərinin olduğunu bilirdim. Onlar həqiqətən sözün əsl mənasında hər zaman dəstək olublar. İstər oynadığım, istər oynamadığım vaxtlarda arxamda durublar. "Neftçi"də oynamaq, məncə, hər bir futbolçunun arzusudur. Mən də bu arzumu gerçəkləşdirdiyim üçün sevinirəm. "Neftçi"yə getməyimi karyeramın mənfi addımı kimi qiymətləndirməzdim. Düzdür, oynamadım. Yaş amili də, limit məsələsi də var idi. Sonradan legioner limiti ləğv olundu və komandaya yeni futbolçular alındı. Daha çox onlara güvəndilər, mənə isə güvənmədilər. Düzdür, məşqlərdə maksimum çalışırdım. Bunu məşqçilər də, rəhbərlik də təsdiqləyə bilər. Hər zaman nizam-intizamım, məşqlərə yanaşmam, şans veriləndə çıxışlarımdan razı qalıblar. Heç göndərmək fikirləri də yox idi. Söhbətlərimizdə də deyirdilər ki, biz səni zorla göndərmirik. Bu, özümün seçimim oldu. Sağ olsunlar, hörmətlə yanaşdılar. Mən də karyeramı uzatmaq baxımından daha çox şans qazanacağım "Qəbələ"yə gəldim.

- Həmin vaxt komandaya sabiq baş məşqçi Samir Abasovun istəyilə gəlmişdim. "Neftçi" daim ilk pillələr üçün oynadığından, hara getdiyimi, rəqabətlə üzləşəcəyimi anlayırdım. "Qəbələ"də də rəqabət var, heç vaxt bu məsələyə boş yanaşmaq olmaz. Sadəcə, "Neftçi"də 2025/2026 mövsümünün ikinci yarısında yerli limiti aktiv idi, legioner məhdudiyyəti götürülməmişdi. Sonradan legioner limiti ləğv olundu, əcnəbi futbolçular alındı və belə deyərdim ki, daha çox onlara güvəndilər. Mənə isə güvənmədilər. Düzdür, hər kəslə - istər rəhbərlik, istər məşqçilər heyəti, istərsə də bütün kollektivlə hər zaman qarşılıqlı hörmətimiz olub. Hörmətimi saxlayıblar. Sadəcə, futbolçu olaraq, daha az şans qazandım. Bəlkə də mənə inanmadılar. Mən də karyeramı uzatmaq baxımından belə bir seçim etdim.

- Bəli, yayda da təkliflərim var idi. Sadəcə, "Neftçi"də qalmağı həqiqətən çox istəyirdim. "Sumqayıt"la oyundan sonra da demişdim ki, "Neftçi"də qalmağa üstünlük verirəm. Qarşılıqlı olaraq onlar da istəkli yanaşdılar. Əlbəttə, "Qəbələ"yə gələndə oynamaq baxımından müəyyən maddi məsələlərdən keçməli oldum. İnanıram ki, gələcəkdə oynayacağam. Çünki futbol elə bir sahədir ki, burada futbolçu nə qədər çox oynasa… Düzdür, bu gün məğlub olmuşuq, amma oynadığım üçün çox sevincliyəm. Səhvlərimi analiz edəcəyəm, amma oyun praktikası mənim üçün tam başqa bir şeydir. Oynamayanda insan daha çox kölgədə qalır, daha çox yaddan çıxır. Mən düşündüm ki, bu il də otursam, bu il də oynamasam, daha çox yaddan çıxacağam. O baxımdan oynayıb ən azı göz önündə olub milli komandaya hardasa bir namizədlər sırasında olacağımı düşünürəm.

- Bəli, mən də onu düşündüm. Fikrimcə, bura daha əvvəl gəlsəydim və hardasa 3 oyun şansım olsaydı… Düzdür, heyət 6-cı tur öncəsi açıqlandı. "Qəbələ"yə keçidimə dair qərarı daha tez versəydim, bəlkə, heyətdə mən də olacaqdım. Millidə oynamağı həqiqətən çox istəyirəm. Gələcəkdə təklif alaram.