"Milliyə çağrılmağım üçün daha çox oynamağım lazımdır" - Ayxan Hüseynov

Dünən Misli Premyer Liqasının 27-ci turunda "Turan Tovuz" "Sumqayıt"a məğlub oldu - 1:2.

Qarşılaşmadan sonra meydan sahiblərinin üzvü Ayxan Hüseynov jurnalistlərin suallarını cavablandırdı.

Sport1.az həmin müsahibəni təqdim edir...

- Vacib oyunda məğlub oldunuz. Matçda çətinlik çəkdiniz. Oyun haqda nə düşünürsən?
- Məncə, qarşılaşmaya yaxşı başlamışdıq. Qol epizodları yaratdıq, amma fərqlənə bilmədik. Komanda olaraq ucuz səhvlər etdik. Çətin qollar vururuq, asanını buraxırıq. "Sumqayıt"ın 2 şansı oldu. Hər ikisi də öz səhvimiz idi. Bəxtimiz gətirmədi. Faiq ofsayta düşdü. Oyunçu topu boş qapıdan çıxartdı. Rəqibin qapıçısı da əla oyun keçirdi. Qalib gəlmək istəyirdik, amma alınmadı.

- Bəlkə də meydandan daha yaxşı görünürdü. Topun xətdən çıxarıldığı epizod barədə nə deyə bilərsən? Qol idi?
- Künc zərbəsini mən yerinə yetirdim. Qayda belədir ki, top xətti tam keçməlidir. Bunun olduğunu 100 faiz deyə bilmərəm. Həmin epizodun qol olduğunu düşünürəm. Ola bilər ki, topun millimetri qapıdan keçməmişdi. Bəlkə də buna görə qol sayılmadı.

- Matçlarda çox çətinlik çəkirsiniz. Bunun səbəbi nədir?
- İlk dəqiqələrdən oyuna yaxşı başlayırıq. Ya da oyunun əvvəlindən matça pis başlayırıq. Bizdə stabillik yoxdur.

- Tovuzdakı görüşlərdə matça yaxşı başlayırsınız. Sonra nəsə olur, komanda səhvə yol verir və lazımsız xal itirir. Bunun səbəbi nədir? Bəlkə azarkeşlərinizə qələbə sevinci yaşatmaq istəyinizin çox olması sizə mane olur?
- Fanatlarımızı çox sevirik. Onlara ancaq sevinc yaşatmaq istəyirik. Azarkeşlər bizim 12-ci oyunçularımızdır. Onlara sevinc yaşatmaq istədiyimizə görə arada konsentrasiyamızı itiririk. Ucuz səhvlər edərək qollar buraxırıq.

- Çempionatda çıxış edən komandalar fasiləyə yollandı. Qarşıda millinin yoxlama görüşləri var. Millidə bəzi dəyişiklər oldu. Hətta I Liqada çıxış edən tutbolçu yığmaya dəvət olunub. Sən niyə çağrılmadın? Bu dəfə dəvət olunacağına ümid edirdin?
- (gülür). Şükürlər olsun ki, Azərbaycan vətəndaşlığını ala bildim. Milliyə çağrılmağım üçün daha çox oynamağım lazımdır. Bu gün mövsüm ərzində ilk dəfə idi ki, 90 dəqiqə meydanda oldum. Digər oyunlarda daha az oynamışam. Bu səbəbdən də öz üzərimdə çox çalışmalıyam. Milliyə çağrılmaq üçün bütün oyunlarda meydana çıxmalıyam.

- Belə başa düşdüm ki, milliyə çağrılmamağının günahını özündə görürsən?
- 100 faiz.

- Bəzən elə olur ki, öz komandasında mütəmadi oynamayan futbolçuları milliyə çağırırlar. Sən az oynasan da, faydalı iş əmsalın yüksəkdir. Belə olan təqdirdə, milliyə niyə dəvət olunmursan?
- Mənə çox maraqlıdır ki, bu necə olur? Bu barədə dəhşət fikirləşirəm. Oyunçu zədəli olub, ya az oynayıb, amma milliyə çağrılıb. Görürsən ki, iki fərqli futbolçu var. İkisi də az oynayıb, amma biri çağrılır, digəri yox. Niyə? Bunu heç cür anlaya bilmirəm.