Ehtiram Quliyev, sən peyğəmbər deyilsən!

Rəvayətə görə, Məhəmməd peyğəmbər özünü Allahın elçisi elan edəndən sonra bir xanımla problem yaşayır.

Yaşlı bir qadın evinin eyvanın qarşısından keçən seçilmiş şəxsin başına hər gün zibil atır. Bu hal mütəmadi olaraq davam edir. Bir gün yaşlı qadın peyğəmbərin başına zibil atmır. Bu, Allahın elçisinə qəribə gəlir. Dərhal yaşlı qadının qapısının önünü kəsir. Qarı peyğəmbəri görəndə özünü itirir, məyus halda soruşur ki, burada nə gəzirsən?

Peyğəmbər cavabında deyir: "Hər gün başına zibil atırdın. Bu gün hadisə baş tutmadı. Narahat oldum. Bəlkə köməyə ehtiyacın olar deyə düşündüm. Hər şey qaydasındadır?"

Allahın elçisinin bu sözlərindən sonra yaşlı qadının gözləri dolur. Ağlayaraq peyğəmbərin əlindən öpmək istəyir. Qarı nənə deyir: "Mən hər gün sənə pislik edirdim. Başına zibil tökürdüm. Sən buna görə mənə nifrət etmədin. Hətta halımın necə olması ilə maraqlandın. Səni bizə göndərən Allaha qurban olum. Mən də sənin dininə sitayiş etmək istəyirəm".

Bunu yas mərasimdəki mollalardan biri nəql etmişdi. Hadisə zamanı dəqiq nələr baş verib, hansı sözlərdən istifadə olunub bilmirəm. Bildiyim bir şey var ki, haşa "Turan Tovuz"un İdarə Heyətinin sədri Ehtiram Quliyev peyğəmbər deyil. Nə əlaqə? Gəlin, izah edim.

Bu mövsüm hakimlikdən ən çox şikayət edən klub "Turan Tovuz"dur. Allah var, etirazlarının çoxu haqlı olub. Premyer Liqanın 24-cü turunda "Şamaxı" - "Turan Tovuz" matçında VAR və canlı yayım yox idi. Qərb təmsilçisi də oyunun idarəçiliyi ilə bağlı şübhələri olduğunu bildirən bəyanat yaydı. Buna görə də, AFFA "boz qurd"u nə az, nə çox 20 min manat cərimələdi...

Ehtiram Quliyev dünən "Zirə" ilə oyunda sonra jurnalistlərə müsahibəsində məsələ ilə bağlı açıqlama verdi. Dedi ki, qərarla razılaşmırıq, amma şikayətçi olmayacağıq, münasibətlərimiz yaxşıdır.

Hörmətli Ehtiram bəy, sizə qarşı ədalətsizlik edilib. AFFA-nın İntizam Komitəsinin qərarının hüquqi əsası yoxdur. Bu qədər səxavətli olmağa gərək yoxdur. 20 min manat da az məbləğ deyil. Nəyə görə, haqlı ola-ola bu pulu AFFA-ya ödəməlisiniz? Haqlı mübarizənizi aparmalısınız. Qərarın ədalətsiz olduğunu bütün ölkə bilir. Buna etiraz etsəydiniz, AFFA-nın özünün cəzalanmasına səbəb ola bilərdiniz. Amma etmədiniz. Ədalətsizliyə göz yummağın özü də ədalətsizlikdir. Ya da belə deyim. Siz peyğəmbər deyilsiniz ki, pisliyə yaxşılıqla cavab verəsiniz...

İLKİN SULTANLI