Qismət Alıyev: "Ruslana başa salmağa çalışırdım ki..." - MÜSAHİBƏ

Misli Premyer Liqasının 25-ci turunda "Zirə" "Turan Tovuz"u 2:0 hesabı ilə məğlub etdi.

Sport1.az xəbər verir ki, qarşılaşmadan sonra "qartallar"ın kapitanı Qismət Alıyev jurnalistlərin suallarını cavablandırdı.

Millimizin üzvünün maraqlı müsahibəsini diqqətinizə çatdırırıq...

- Gərgin qarşılaşmada 3 xal qazandınız. Görüş haqda nə deyə bilərsən?
- Tovuz səfəri bütün komandalar üçün çətindir. Biz də bilirdik ki, qarşıda bizi çətin oyun gözləyir. Buna görə də matça tam istəklə hazırlaşırdıq. Düşünürəm ki, çox vacib 3 xal qazandıq. Qarşıda bizi “Səbail”lə oyun gözləyir. Fikrimizi ancaq həmin matça yönəldəcəyik.

– İkinci pillədəki yerinizi möhkəmlətmək komandanı daha da rahatladır?
– Xeyr. Birinci dövrədə elə zaman oldu ki, 13 xal geriyə düşdük. Hər bir komandanın başına gələ biləcək gözlənilməz nəticələr olur. İndi heç bir oyunda rahatlıqla qələbə qazanmaq olmur. İndi fikrimiz ancaq “Səbail”lə oyundadır. Sonuncu pillədə olmalarına baxmayaraq, Cavid Hüseynovun gəlişindən sonra oyun planlarında çox irəliləyiş var.

– Sizə yaxın olan komandalar – “Araz-Naxçıvan” və “Turan Tovuz”la müqayisədə daha kompaktsınız. Demək olar ki, avrokuboklara onlardan bir addım daha yaxınsız?
– Öz oyunumuzdan başqa heç kimə baxmırıq. Demirik ki, filan komanda xal itirsin və ya qazansın. Ancaq qarşıdakı oyuna köklənirik.

– Bugünkü oyunda qırılma nöqtəsi harada oldu?
– Heç hesab 2:0 olanda belə bunu qırılma nöqtəsi saymaq olmazdı. Çünki son dəqiqələrdə “Turan Tovuz” bütün qüvvəsiylə irəli atılmışdı. Hər standart vəziyyətlər də bizim üçün çox təhlükəli idi. Biz də komanda şəklində yaxşı müdafiə olunaraq, səhv etmədik və 3 xalı qazandıq.

– Oyunun ilk dəqiqələrində tovuzlu azarkeşlərin sizə aqressiyası müşahidə olundu. Hətta Ruslan Abışovla həmin epizodda dialoqunuz baş tutdu…
– Həmin epizodda zədəli oyunçu var idi və Ruslanla topu meydandan vurub çıxartmaq barəsində danışdıq. İsmayıl Zülfüqarlı da bildirdi ki, həmin epizodda zədəliyə görə yox, sadəcə həmin məqamda topu vurub çıxartdıq. Mən də Ruslana başa salmağa çalışırdım ki, oyunçu zədələndiyinə görə topu çıxartsaydılar, biz də onlara qaytaracaqdıq. Belə böyük bir şey olmadı.

– Ölkə kubokunda “Araz-Naxçıvan”la hər iki oyunda 1 qol belə vura bilmədiz. Turnir cədvəlində qabaqladığınız komandaya qarşı belə nəticə gözlənilməz oldu. Səncə, cütün taleyini nə həll etdi?
– Hər iki oyuna baxdıqda, bəlkə də turu keçən tərəf biz ola bilərdik. Oyun baxımından bu belə idi. Bu mövsüm “Araz-Naxçıvan” “Qarabağ”dan sonra ən az qol buraxan komandadır. İlk oyunda baş məşqçimiz rotasiyalar etmişdi və məğlub olmuşduq. İkinci matçda da gözləmədiyimiz halda penaltilərdən fərqlənərək hesabı 2:0 etdilər. İki oyunda 3 penaltidən qol buraxdıq. Qarşılaşmaya baxdıqda, biz onlardan heç nədən geri qalmırdıq. Sadəcə “Araz-Naxçıvan” müdafiədə çox yaxşı oynadı. Keçən mövsüm kubokda finala çıxmışdıq. Həqiqətən də ölkə kubokunun finalına çıxmaq, komanda üçün böyük nəticədir. İndiysə qarşıda bizi çempionat oyunları gözləyir. Hansı ki, həmin oyunların hamısı finala bərabərdir.

– Hər işdə bir xeyir var məsəlin yada salsaq, kubokda mübarizəni dayandırmaqla, çempionata daha da yaxşı şəkildə köklənəcəyinizi demək mümkündür?
– Keçən mövsüm də 3 gündən bir oyunlarımız olurdu. Təbii ki, kubokun finalına çıxmaq istəyərdik. Amma alınmadı. Ümid edirəm ki, komanda üçün xeyirli olar.