İki güləşçimiz yarımfinalda

Albaniyanın paytaxtı Tiranada keçirilən 23 yaşadək güləşçilər arasında Avropa Çempionatı davam edir.

Sport1.az xəbər verir ki, yarışın 6-cı günündə yunan-Roma güləşi üzrə 5 çəkidə mübarizəyə start verilib, digər kateqoriyalarda təsəlliverici qarşılaşmalar baş tutub.

Azərbaycan millisinin yarışa başlayan 5 güləşçisindən ikisi yarımfinala yüksəlib. Xasay Həsənli isə bürünc uğrunda qarşılaşmaya vəsiqə qazanıb.

Yunan-Roma güləşi
60 kq
Hüseyn Qəribov 1/8 finalda türkiyəli Mert İlbarsa 4:6 hesabııyla məğlub olub.

67 kq
Fərid Xəlilov almaniyalı Yanis Hainzelbekkeri (6:0) mübarizədən kənarlaşdırsa da, 1/4 finalda rusiyalı Daniyal Ağayevə (UWW) 1:5 hesabıyla məğlub olub.

72 kq
Ruslan Nurullayev bolqarıstanlı Dimitar Georgiyevə tam üstünlüklə (10:1), litvalı Rokas Çepauskasa isə 3:1 hesabıyla qalib gələrək yarımfinala yüksəlib. O, yarımfinalda ukraynalı Oleq Xəlilovla qarşılaşacaq.

77 kq
Xasay Həsənli təsəlliverici görüşdə bolqarıstanlı Albert Doyevə 7:3 hesabıyla qalib gələrək bürünc medal uğrunda qarşılaşmaya vəsiqə qazanıb. O, üçüncü yer uğrunda çexiyalı Mixal Zelenkayla güləşəcək.

82 kq
Elmin Əliyev macarıstanlı Dominik Botosa 5:2, isveçli Aleksander Yohanssona isə 6:5 hesabıyla qalib gələrək yarımfinala yüksəlib. O, finala vəsiqə üçün moldovalı Aleksandru Soloveylə qarşılaşacaq.

97 kq
Aqil Musayev 1/8 finalda ermənistanlı Harutyun Kirakosyana "tuş"la məğlub olub.

Qeyd edək ki, yarımfinallar Bakı vaxtı ilə 19:45-də, medal görüşləri isə 21:00-da başlayacaq.