Messi əfsanələr sırasında, Mbappedən yeni rekord

Futbol üzrə dünya çempionatının qrup mərhələsində ötən gecə keçirilən oyunlardan sonra bir sıra maraqlı statistik göstəricilər qeydə alınıb.

Sport1.az FIFA-ya istinadən xəbər verir ki, Argentina millisinin kapitanı Lionel Messi dünya çempionatları tarixində ardıcıl altı oyunda qol vuran üçüncü futbolçu olub. Daha əvvəl bu nailiyyətə yalnız Fransa millisinin sabiq üzvü Jüst Fonten (1958) və Braziliya yığmasının keçmiş hücumçusu Jairzinyo (1970) imza atmışdılar.

Fransa millisinin hücumçusu Kilian Mbappe isə mundiallar tarixində yeni rekorda imza atıb. O, dünya çempionatlarında altıncı dəfə bir oyunda iki və ya daha çox qol vuraraq bu göstəricidə bütün futbolçuları geridə qoyub.

Norveç millisi də növbəti qələbəsi ilə diqqət çəkib. Skandinaviya təmsilçisinin dünya çempionatlarında qazandığı dörd qələbənin hər biri fərqli konfederasiyanı təmsil edən komandalar üzərində əldə olunub.

Əlcəzair yığmasının statistikası isə uğursuz göstərici ilə yadda qalıb. Afrika təmsilçisi dünya çempionatlarında keçirdiyi 15 oyunda cəmi bir dəfə qapısını toxunulmaz saxlaya bilib. Bu, 2010-cu ildə İngiltərə millisinə qarşı qolsuz heç-heçə ilə başa çatan görüşdə qeydə alınıb.