Norveçdən ikinci qələbə

Norveç millisi futbol üzrə dünya çempionatının I qrupunda ikinci tur oyununda Seneqalı 3:2 hesabı ilə məğlub edərək vaxtından əvvəl pley-off mərhələsinə vəsiqə qazanıb.

Sport1.az xəbər verir ki, Norveçin qollarını Markus Pedersen və Erlinq Holann vurublar. Holann 48-ci və 58-ci dəqiqələrdə fərqlənərək dubla imza atıb. Seneqalın heyətində isə İsmaila Sarr 53-cü və 90+3-cü dəqiqələrdə qollar müəllifi olub.

Bu nəticədən sonra Erlinq Holann mundialda vurduğu qolların sayını 4-ə çatdırıb. O, bu göstəricidə Fransa millisinin hücumçusu Kilian Mbappe ilə eyni nəticəyə malikdir. Turnirin bombardirləri siyahısına isə 5 qolla Argentina millisinin kapitanı Lionel Messi başçılıq edir.

Norveç millisi sonuncu dəfə 1998-ci ildə dünya çempionatının pley-off mərhələsinə yüksəlmişdi. Həmin mundialda komanda qrup mərhələsini bir qələbə və iki heç-heçə ilə başa vurmuş, 1/8 finalda İtaliyaya 0:1 hesabı ilə uduzmuşdu.

İki turdan sonra I qrupda Fransa və Norveç millilərinin hərəsinin 6 xalı var. Seneqal və İraq isə hələ də xal qazana bilməyiblər.

Qrup mərhələsinin son turunda Norveç Fransa ilə, Seneqal isə İraqla qarşılaşacaq. Hər iki oyun iyunun 26-da keçiriləcək.