"Fənərbağça" futbolçusu ilə vidalaşa bilər

Türkiyə “Fənərbağça”nın niderlandlı futbolçusu Antoni Musaba komandadan ayrıla bilər.

Sport1.az “Football Insider”ə istinadən xəbər verir ki, 25 yaşlı niderlandlı vinger yenidən İngiltərədə oynamaq istəyir.

Çempionşipə düşən “Vest Hem” və “Vulverhempton” niderlandlı futbolçunun xidmətində maraqlıdır. Hər iki klubun yay transfer pəncərəsində heyətini Musaba ilə gücləndirməyi nəzərdən keçirdiyi bildirilir.

Futbolçunun transfer dəyəri 7 milyon avro göstərilir. İstanbul klubu da futbolçunun ayrılığına etiraz etmir və gələcək təklifləri dəyərləndirməyə hazırdır.

Musaba 2025-ci ilin yayında “Şeffild Uensdey”dən “Samsunspor”a 1 milyon avroya transfer olunub. O, ötən mövsümün qış fasiləsində isə 5 milyon avro qarşılığında “Fənərbağça”ya keçib.

Musaba 2026-cı ilin əvvəlindən bəri “sarı-lacivərtlilər”in heyətində bütün turnirlərdə 23 oyuna çıxıb, 2 qol və 6 məhsuldar ötürmə ilə yadda qalıb.