Rəşad Rəsullu: "Bakıda keçirilən bu mundial uzun müddət xatırlanacaq"

Bölmə adı Cüdo

Yayımlandı 12-10-2026, 15:59

142

"Dünya Çempionatı təşkilatçılıq və nəticələr baxımında çox yaxşı alındı və uzun müddət xatırlanacaq”.

Sport1.az xəbər verir ki, bunu Azərbaycan Cüdo Federasiyasının (ACF) icraçı vitse-prezidenti Rəşad Rəsullu Bakıda keçirilmiş mundialın yekunlarına həsr olunmuş mətbuat konfransında deyib.

Rəsullu Prezident İlham Əliyevə açılışda iştirak etməsi və dünya çempionu Əhməd Yusifovu qəbul etməsini qürur mənbəyi və stimul rolunu oynadığını bildirib:

"Onun cüdoya göstərdiyi dəstəyin mənəvi nəticəsi olaraq, bu nailiyyəti əldə etdik. Eyni zamanda Beynəlxalq Cüdo Federasiyasının prezidenti Marius Vizerə, gənclər və idman naziri Fərid Qayıbova, Milli Olimpiya Komitəsi və dövlət qurumlarına, sponsorlarımıza təşəkkürümüzü bildiririk. Ən böyük təşəkkürlərdən birini federasiyamızın kollektivinə rəhbərimiz adından ifadə edirik. Əldə olunmuş nəticələr qarşılığında isə məşqçilər, tibbi heyətinə dərin təşəkkürümüzü bildiririk. Ən böyük təşəkkür isə cüdoçularımıza düşür".

Federasiya olaraq, nəticələri yüksək qiymətləndirən qurum rəsmisi bir sıra rekordlara imza atdıqlarını söyləyib:

"7 çəkidən 5-də medal qazanmışıq, 7 idmançımızdan 5-i ilk dəfə dünya çempionatında medalçılar sırasına düşüb. Heyətin dərinliyini yaratmağa kişilərdən ibarət komandada nail olmuşuq. Bu nəticələr növbəti mərhələ üçün start nöqtəsidir. İşimiz bundan sonra da davam edəcək, dayanmaq fikrimiz yoxdur. Qarşıda daha ciddi və böyük yarışlarımız olacaq. Amma ən əsası, Los Anceles-2028 Yay Olimpiya Oyunlarıdır. Əsas diqqətimiz olimpiadaya yönələcək. Dünya çempionatındakı nəticələrimiz göstərdi ki, sırf idman nəticələri və cüdonun keyfiyyəti baxımından düzgün istiqamətdəyik və idmançılarımızın inkişafı göz qabağındadır".

O, qadınlardan ibarət millidə də inkişaf gördüyünü bildirib:

"Bilirəm ki, gözləntilər böyükdür. Amma komanda üzvləri artıq bir qapıya uduzmurlar. Məsələn, komanda yarışında avstriyalıları 2, yaponiyalıları isə 1 qadın cüdoçumuz məğlub etdi. Qadın cüdosu kişilərdən çox geridədir. Biz bu istiqamətdə vəzifə və məsuliyyətimizi bilirik və hədəflərimizə doğru gedirik. Hazırda düzgün inkişaf yolunda olduğumuzu bilirik".

Tədbirdə ACF-nin vitse-prezidenti, olimpiya çempionu Elnur Məmmədli və millinin baş məşqçisi Riçard Trautman da iştirak edib.

4 - 11 oktyabrda Milli Gimnastika Arenasında təşkil olunmuş dünya çempionatında Azərbaycan cüdoçuları 7 medal qazanıblar. Əhməd Yusifov (60 kq) qızıl, Zelim Tskayev (81 kq) və Uşangi Kokauri (+100 kq) gümüş, Rəşid Məmmədəliyev (73 kq), Ömər Rəcəbli (81 kq), Murad Fətiyev (90 kq) və Kənan Nəsibov (+100 kq) bürünc medala sahib olublar.

Müəllif: Rövşən Əlisoy