Vernidub: “Qəbələdə oynamaq hər zaman çətindir”

Misli Premyer Liqasının VI turunda səfərdə “Qəbələ”ni 3:0 hesabı ilə məğlub edən “Neftçi”nin baş məşqçisi Yuri Vernidub matçdan sonra keçirilən mətbuat konfransında jurnalistlərin suallarını cavablandırıb.

Sport1.az xəbər verir ki, ukraynalı mütəxəssis növbəti turdakı rəqib “Sabah”ın avrokubok matçı səbəbindən oyunun təxirə salınma ehtimalına münasibət bildirdi:

“Hələlik bu barədə düşünmürəm. “Qəbələ” ilə oyundan sonra futbolçulara özlərini bərpa etmələri üçün 5 günlük istirahət veririk. 6 oyunçumuz müxtəlif milli komandalara dəvət alıb. Sentyabrın 24-də öz bazamızda toplanıb “Sabah”la matçın hazırlıqlarına başlayacağıq. Nəzərə alsaq ki, “Sabah” son çempiondur və hazırda çox yaxşı formadadır, bu qarşılaşmaya ciddi yanaşırıq. Oktyabrın 2-də “Araz-Naxçıvan”la yoldaşlıq görüşümüz nəzərdə tutulub, daha sonra isə “Sabah”la oyuna köklənəcəyik. Çünki bu matçdan sonra bizi “Qarabağ” və “Turan Tovuz”la ağır sınaqlar gözləyir. Rəqibin təxirəsalma istəyinə gəlincə, müraciət etsələr, biz belə məsələlərə hər zaman loyal yanaşırıq. Vaxtilə “Qarabağ” müraciət edəndə də oyun təxirə salınmışdı. İstəyirik ki, Azərbaycan klubları avrokuboklarda uğur qazanaraq ölkənin reytinq xallarını artırsınlar. Düzdür, oyunun təxirə salınması təqvim baxımından sıxlıq yarada bilər, çünki matçlarımız adətən cümə günləri olur və növbəti tura hazırlaşmaq üçün vaxt lazımdır”.

– İlk hissədə komandanın istənilən oyunu göstərə bilməməsinə Qəbələdəki dəniz səviyyəsindən yüksəklik və havanın təsiri ola bilərmi? İkinci yarıda Emin Mahmudovu əvəzləməyiniz fiziki yorğunluqla bağlı idi, yoxsa taktiki addım idi?

– Əvəzetmə Eminin fiziki forması ilə bağlı deyildi. Qəbələdə oynamaq hər zaman çətindir. Keçən mövsüm də bu iqlimə və havaya uyğunlaşmaq üçün müəyyən vaxt lazım gəlmişdi. Futbolçularımız ilk hissədə məhz bu adaptasiyaya sərf etdilər. İkinci yarıda isə tam fərqli və istədiyimiz oyunu nümayiş etdirə bildik.