“Samir Abasovun günahı yoxdur” - "Neftçi"nin veteranı

"Neftçi" tarixinin ən pis dönəmlərindən birini yaşayır.

Bakı klubu Azərbaycan Kubokunda mübarizəni dayandırıb. Premyer Liqada 32 turdan sonra 36 xalla 6-cı pillədə qərarlaşıb.

Samir Abasovun gəlişindən sonra "ağ-qaralar"ın düzələcəyi düşünülürdü. Amma bu, baş vermədi. Mütəxəssisin göndərilməsini istəyənlər var. Görəsən, "Neftçi"nin uğursuzluqlarının səbəbkarı baş məşqçidir? O, göndərilməlidir? Suallarımızı veteran futbolçu Paşa Əliyevə ünvanladıq.

"Neftçi"nin sabiq üzvü məsələ ilə bağlı Sport1.az-a açıqlamasında bunları söylədi:

“Kubok matçında komandanın bəxti gətirmədi. “Neftçi” ilk oyunla müqayisədə daha yaxşı oynadı. Çoxsaylı qol imkanları oldu. Filip Ozobiç 3 real fürsətini boşa verdi. Təbii ki, “Sabah”da rəqibini yaxşı təhlil etmişdi. İlk oyundakı üstünlüyünü əldən vermək istəmirdi. Bakı təmsilçisi nə qədər çalışsa da, oyunda geridönüş edə bilmədi. Çoxları kimi mən də kubokun finalında “Neftçi” – “Qarabağ” cütünü görmək istəyirdim. Amma alınmadı. Nə qədər ağır olsa da, “Neftçi” üçün kubok macərası bitdi və onların mövsümdə titul qazanmaq şansları olmayacaq. Bu gün çoxları Samir Abasovu istefa verməli olduğunu düşünür və ya komandadan göndərilməsinə çağırış edir. Üzümü həmin şəxslərə tutub deyirəm ki, Samir müəllimin heç bir günahı yoxdur. Komandanı o, yığmamışdı. Mövsümün əvvəlindən “Neftçi”nin sükanı arxasına o, keçsəydi, indi daha kreativ və ilk “4-lük”də yer alan “Neftçi” görəcəkdik. Tək Samir Abasov yox, istənilən yerli məşqçilərimizə şans veriləcəksə, ən azı 3 il vaxt lazımdır. Artıq gələn mövsüm üçün planlar qurulmalıdır. Komandada yer alan oyunçuların 50% yola salınmalıdır. Əsasən Emin Mahmudov kimi meydanda can qoyan, döyüşən futbolçular yer almalıdır. Ancaq pulu düşünənlərə “Neftçi”də yer olmamalıdır”.