Bakı klubunun amerikalısının istedadını atası ortaya çıxardıb - MÜSAHİBƏ

NTD-nin basketbolçusu Tayri Boykin klubun mətbuat xidmətinə müsahibə verib.

Sport1.az xəbər verir ki, amerikalı legioner Azərbaycan Basketbol Liqasının XVI turunda qarşılaşdıqları “Abşeron”la matçı şərh edib. O, həmçinin komandasının pley-off şanslarını dəyərləndirib.

- Hesabat turunda "Abşeron" üzərində qələbə qazandız. Bu oyunu necə şərh edərdiz?
- "Abşeron"la yaxşı oyun keçirdik. Komanda oyunumuzu nümayiş etdirdik və oyunun gedişatını nəzarət altında saxladıq. Rəqib oyunda üstünlük qazanmağa başladıqda, biz buna yaxşı cavab verdik. Hesab edirəm ki, doğru istiqamətdə daha bir addım atdıq.

- Oyunda 8 dəqiq 3 xallıq atış etdiniz. Ümumiyyətlə, sizdə “3-lük” çox yaxşı alınır. Həmişə belə olub?
- Ömrüm boyu atış üzərində çalışmışam. Atam məni uşaqlıqdan məşq etdirirdi. O, mənə zəhmətkeşlik, oyunun əsaslarını və intizamı aşılayıb, xüsusilə də atışla bağlı. Bu səviyyədə basketbol oynayarkən, Tanrının sizə verdiyi istedadı maksimum istifadə etmək, ağır işləmək və özünüzün ən yaxşı versiyası olmaq lazımdır. Kiminsə daha çox istedadı var, kiminsə daha az. Amma hər kəs öz üzərində çalışmalıdır.

- Növbəti rəqib çempionatın liderlərindən biri olan "Naxçıvan"dır. Hazırlıq necə gedir?
- Anlayırıq ki, "Naxçıvan" liqanın ən güclü klublarından biridir. Amma başa düşürük ki, sahib olduğumuz istedadla hər kəslə rəqabət apara bilərik. Hər zaman olduğu kimi, özümüzə fokuslanmışıq. Yeganə gözləntimiz meydana çıxıb yüksək səviyyədə rəqabət aparmaqdır. Məşqçilərimizin oyun taktikasına güvənirik və meydanda bir-birimizə də etibar edirik.

- Komandanın pley-offa çıxmaq şanslarını necə qiymətləndirirsiniz?
- Hesab edirəm ki, əla bir imkanımız var. İlin əvvəlində komanda mühüm dərəcədə gücləndi. Bir-birimizlə oynamağı öyrənməyə davam edərkən matçları qazanırıq. Çox təhlükəli bir komandaya çevrilirik. Ən yaxşı basketbolumuz hələ qabaqdadır və bunu pley-offda nümayiş etdirməkdən yaxşı nə ola bilər?