"İmişli"nin baş məşqçisi üsyan etdi: "Açıq-aşkar təhqirlər eşidilirdi"

"İmişli"nin baş məşqçisi Fərid Namazovun Sport1.az-a müsahibəsi

- Mövsümdə "Qəbələ"ni məğlub edən ilk komanda oldunuz. Nə hisslər keçirirsiniz?
- Oyunun çətin keçəcəyini bilirdik. Bu görüşə çox yaxşı hazırlaşmışdıq. "Qəbələ"nin bu mövsüm heç bir komandaya məğlub olmaması bizim üçün ayrı bir motivasiya idi. Azarkeşlərimizin önündə xal itirmək istəmirdik. Tək "Qəbələ"ni məğlub etmək yox, Premyer Liqa yolunda yerimizi təmin etmək üçün qələbə bizə mütləq şəkildə lazım idi. 90 dəqiqə ərzində tamamilə üstün olan tərəf biz idik. Əlbəttə, rəqibimizin də bir çox təhlükəli epizodları oldu, bu, normaldır. Qalib gəlsəydilər, çempion olacaqdılar. Buna imkan vermək istəmirdik. Çox sevincliyik. Növbəti oyunlara daha da diqqətli şəkildə hazırlaşacağıq.

- Bu qələbə ilə artıq "İmişli"nın Premyer Liqaya layiq bir klub olduğunu göstərmiş oldunuz?
- İstər futbolçular, istər mən tərəfdən çox önəmli bir addım atmış olduq. Fikirləşirəm ki, öz üzərimizdə daha çox işləmək lazımdır. Təkcə bu qələbəylə yetinmək olmaz. Hələ ki, Premyer Liqaya vəsiqəni tam təmin etmədiyimiz üçün nəsə dəqiq bir şeylər söyləyə bilmərəm. Hər şey dəqiqləşdikdən sonra bununla bağlı nələrsə demək daha düzgün olar.

- Oyunun 90 dəqiqəsi tamam olmuş rəqib komandanın baş məşqçisi Kaxaber Sxadadze stadionu tərk etdi. Matçdan sonra sizi təbrik etdi?
- Yox. Heç bir təbrik olunmadı. Oyun ərzində, əsasən də rəqib hesabda geri düşdükdən sonra aqressiv hərəkətlər göstərirdilər. Açığı bunlar bizi maraqlandırmır. Bizi maraqlandıran tək şey özümüzük. Düşünürəm ki, hakimlərimiz hər iki tərəfə də eyni münasibəti bəsləməlidirlər. Burada nəsə gizlədiləsi bir şey yoxdur. Açıq-aşkar təhqirlər eşidilirdi və bunlara heç bir reaksiya verilmədi. Hansısa bir azərbaycanlı məşqçi nə isə deyəndə günahkar olur. Açıq-aşkar görsənirdi ki, rəqib komandanın baş məşqçisi bir çox təhqirlər edirdi. Provokasiyalar da oldu. Məncə, bu kimi məsələlərdə ayrı-seçkiliyə yol verilməməlidir.

EMİN ZEYNALLI