Azərbaycan millisinin üzvü: "İlk dəfədir ki bir maçda 2 qol vururam"

Azərbaycan millisinin müdafiəçisi Cəlal Hüseynov “Arda”nın “Botev” üzərində qazandığı 2:1 hesablı qələbəni şərh edib.

Sport1.az Bolqarıstan mətbuatına istinadən xəbər verir ki, görüşdə komandasının hər iki qolunu vuran 23 yaşlı futbolçu bunun karyerasının ən yaddaqalan oyunlarından biri olduğunu deyib:

“İlk dəfədir bir matçda iki qol vururam. Bu, mənim üçün çox özəl gündür. Mənə dəstək olan hər kəsə təşəkkür edirəm. Bilirdik ki, “Botev” güclü rəqibdir və turnir cədvəlində bizə yaxındır. Buna görə də qələbə qazanmaq bizim üçün vacib idi”.

Müdafiəçi ikinci qolu zamanı verilən ötürməyə də toxunub:

“Futbol komanda oyunudur. İkinci qolda ötürmə mükəmməl idi və hər şey istədiyimiz kimi alındı. Bu qolları ailəmə həsr edirəm”.

Cəlal qarşıdakı “Lokomotiv”lə görüş barədə də danışıb:

“Rəqibin hansı heyətlə meydana çıxacağından asılı olmayaraq, bizim məqsədimiz yalnız qələbədir. Qarşıdakı oyunlarda maksimum nəticə qazanmağa çalışacağıq”.

Azərbaycanlı futbolçu Bolqarıstandakı həyatından da söz açıb:

“Artıq bolqar dilini yaxşı başa düşürəm. Komandada da bu dildə danışmağa çalışıram. Hələ tam rahat deyiləm, amma uyğunlaşmaqda çətinlik çəkməmişəm”.