İbrahimoviç Kumanı sərt tənqid etdi

İsveç futbolunun əfsanəsi Zlatan İbrahimoviç Niderland millisinin DÇ-2026-nın 1/16 finalında Mərakeşə uduzmasından sonra komandanın baş məşqçisi Ronald Kumanı sərt tənqid edib.

Sport1.az xəbər verir ki, hazırda "Fox TV"də ekspert kimi çalışan keçmiş hücumçu məğlubiyyətə görə əsas məsuliyyətin Kumanın üzərində olduğunu bildirib.

"Bu məğlubiyyət Kumanın günahıdır. Söhbət nəticədən də getmir, Niderland futbolunun kimliyinin itirilməsindən gedir. Kumanın öz baxışı var idi, amma bu, komandanın ruhuna uyğun gəlmirdi. Məni ən çox narahat edən də elə budur. Məğlub olmaq mümkündür, amma öz stilinə sadiq qalmaq vacibdir. Özün olmalısan. Oyunçular topa güclə sahib olurdular və təhlükəli hücum şansları yaratmırdılar. Bu, acınacaqlı bir performans idi. İnanıram ki, buna görə məşqçi məsuliyyət daşıyır" - deyə Zlatan bildirib.

Xatırladaq ki, Niderland yığması dünya çempionatının 1/16 final mərhələsində Mərakeşlə əsas və əlavə vaxtı 1:1 hesabı ilə başa çatan görüşdə penaltilər seriyasında 2:3 hesabı ilə məğlub olaraq mübarizəni dayandırıb. Ronald Kuman isə oyundan sonra seçdiyi taktikanı müdafiə edərək, bunun rəqibin güclü tərəflərini nəzərə alan qərar olduğunu bildirib.