“Qarabağ”dakı kardinal dəyişikliklərin səbəbi budur - MÜTƏXƏSSİS RƏYİ

2025/26 mövsümündə çempionluq mübarizəsində “Sabah”a uduzan “Qarabağ” yeni dövrə qədəm qoyur.

Qurban Qurbanovun məşqçi işlədiyi müddətdə ilk dəfədir ki, Ağdam təmsilçisinin heyətində bu qədər dəyişiklik olur.
Fasilə müddətində komandanı 7 futbolçu tərk edib. 6 yerli oyunçu transfer edilib. Yalnız 2 oyunçu ilə müqavilənin müddəti artırılıb. Rəqəmlər dəyişiklikləri açıq-aşkar göstərir.
Görəsən, bu proses “Qarabağ”a müsbət, yoxsa mənfi təsir edəcək? Heyətin yenilənməsindən sonra “köhlən atlar” 2026/27 mövsümündə çempion ola biləcək?

Suallarımızı tanınmış agent Emil Şükürbəyliyə ünvanladıq. Ekspert mövzu ilə bağlı Sport1.az-a açıqlamasında bunları söylədi:

“Dəyişikliklərə əsas səbəb kimi artıq keçmiş üzvlərin “doymasını”, bəlkə də büdcə yükünü azaltmaq istəyini göstərmək olar. Yeni nəfəs, qələbələrə “ac” oyunçular və geri qazanılmalı olan çempionluq komandanın qarşısında duran əsas məqsəd olacaq.
Təzələrin bir-birinə alışması, oyun fəlsəfəsini qavraması və meydanda buna uyğun performans göstərməsi bir az vaxt alacaq.
Açığı, klubun əldən verilən titula bu cür sürətli və kardinal reaksiya verilməsi alqışlanasıdır. Belə yanaşma uzunmüddətli perspektivdə alışdığımız “Qarabağ”ı görəcəyimizə ümid verir”.