“Qələbədən başqa məqsədimiz yoxdur” – Arbeloa iddialı danışdı
“Real”ın baş məşqçisi Alvaro Arbeloa Çempionlar Liqasının 1/8 final mərhələsində “Mançester Siti” ilə keçiriləcək cavab oyunu barədə danışıb.
Sport1.az AS nəşrinə istinadən xəbər verir ki, madridlilərin çalışdırıcısı qarşılaşmanın çətin keçəcəyini bildirib.
Mütəxəssis matçla bağlı bunları deyib: “Meydana çıxıb qalib gəlməkdən başqa məqsədimiz yoxdur. İlk oyunda göstərdiyimiz təvazökarlıq və fədakarlıqla yenə oynamaq istəyirik. Bu, asan olmayacaq. Sabah meydanda həm təvazökarlıq, həm də ambisiya görmək istəyirəm.
Rəqibimizin gücünü və oyunun nə qədər çətin keçəcəyini yaxşı anlayırıq. Qələbə qazanmaq istəyiriksə, yalnız yüksək səviyyədə oyun göstərməliyik. İlk matçdakı kimi və ya ondan da yaxşı çıxış etməliyik. Komanda olaraq birlik, fədakarlıq və rəqib üçün problemlər yaratmaq istəyimizi meydanda göstərməliyik”.
Qeyd edək ki, komandalar arasında ilk görüşdə Madrid təmsilçisi 3:0 hesablı qələbə qazanıb. Cavab qarşılaşması martın 17-də keçiriləcək.
