Qvardiola: “Onların Çempionlar Liqası titulları bizim illərimizdən çoxdur”

“Mançester Siti”nin baş məşqçisi Xosep Qvardiola Çempionlar Liqasının 1/8 final mərhələsində “Real Madrid”ə qarşı keçiriləcək oyun öncəsi fikirlərini bölüşüb.

Sport1.az xəbər verir ki, ispaniyalı mütəxəssis rəqibin turnirdəki böyük təcrübəsini xüsusi vurğulayıb. Onun sözlərinə görə, komanda illər keçdikcə Avropanın ən nüfuzlu klub turnirində daha da inkişaf edib.

Qvardiola bildirib ki, əvvəllər belə güclü rəqiblərlə mübarizə aparmaq çətin görünürdü: “İlk illərdə tarixən böyük uğurlar qazanan “Real Madrid” kimi komandanı məğlub edə biləcəyimizi düşünmürdük. Biz Çempionlar Liqasında uzun illər çıxış edirik, amma bu rəqib turniri dəfələrlə qazanıb. Onların titullarının sayı bizim yarışda keçirdiyimiz illərdən də çoxdur”.

Təcrübəli məşqçi qeyd edib ki, zaman keçdikcə komanda öz gücünü daha yaxşı anlamağa başlayıb: “Əsas məsələ inkişafdır. İllər ərzində böyüdük və nədə yaxşı olduğumuzu dərk etdik. Klubda qurulan sistem və formalaşan mentalitet bizim üçün ən böyük uğurdur”.

Qeyd edək ki, komandalar arasında ilk qarşılaşma bu gün keçiriləcək. Cavab matçı isə martın 17-də baş tutacaq.