Avropa nəhəngləri Çempionlar Liqasında bu dəyişikliyin edilməsini istəyirlər - İDDİA

Çempionlar Liqasında format dəyişikliyi ola bilər.

Sport1.az xəbər verir ki, Avropanın ən güclü futbol klubları turnirdə komandaların heyətini 28 oyunçuya qədər genişləndirməyi təklif edirlər. Məlumatı "The Guardian” nəşri yayıb.

Bu təklif UEFA-nın klub yarışları komitəsinin iclasında səsləndirilib. Bəzi Avropa nəhənglərinin nümayəndələri hesab edirlər ki, heyətdəki oyunçuların sayının artırılması futbolçuların üzərindəki iş yükünü azaltmağa kömək edəcək. Bu da zədə hallarının azalmasına və matçların rəqabət qabiliyyətinin artmasına səbəb olacaq. 

Lakin komitədəki 16 klubdan bəziləri bu cür dəyişikliklərə qarşıdır. Onlar hesab edirlər ki, heyətin genişləndirilməsi istedadlı oyunçuların ən yaxşı klublara köçməsinə səbəb olacaq. Bu da Avropa futbolunda rəqabətə mənfi təsir göstərəcək və ilk beşlikdən kənar liqaların gəlirlərinin azalmasına səbəb olacaq.

Qeyd edək ki, müzakirədən sonra bu məsələ ilə bağlı heç bir qərar qəbul edilməyib.