Prestianni etiraf etdi: “Vinisiusa meymun dedim”

“Benfika”nın futbolçusu Canluka Prestianni ilə bağlı qalmaqallı iddia yayılıb.

Sport1.az Portuqaliya mətbuatına istinadən xəbər verir ki, argentinalı hücumçu Çempionlar Liqasının pley-off mərhələsində “Real”a qarşı keçirilən ilk oyunda Vinisius Juniora ünvanladığı sözlərlə bağlı komanda yoldaşlarına etiraf edib.

Mənbənin məlumatına görə, Prestianni qarşılaşma zamanı rəqib futbolçuya “meymun” ifadəsini işlətdiyini bildirib. Bununla belə, o, dediklərində irqi motiv olmadığını əsaslandırmağa çalışıb və sözlərinin rasizm kontekstində anlaşılmamalı olduğunu vurğulayıb.

Xatırladaq ki, sözügedən epizoddan sonra matçın ikinci hissəsində oyun qısa müddətə dayandırılmışdı. Vinisius Junior rəqib futbolçunun onu təhqir etdiyini iddia etmişdi. Həmin anda Prestianninin ağzını forması ilə örtməsi diqqət çəkmişdi.

UEFA argentinalı futbolçunu istintaq müddətində müvəqqəti olaraq diskvalifikasiya edib. Hazırda qurum məsələ ilə bağlı araşdırmanı davam etdirir.