“Barselona” bu müdafiə ilə Çempionlar Liqasını qazana bilməz”
“Çelsi”nin və Fransa millisinin sabiq futbolçusu Emmanuel Peti “Barselona”nın hazırkı heyəti ilə Çempionlar Liqasını qazana bilməyəcəyini düşünür.
Sport1.az xəbər verir ki, veteran yarımmüdafiəçi Kataloniya klubunun xüsusilə müdafiə xəttində ciddi problemlərinin olduğunu deyib.
Peti vurğulayıb ki, komandanın əsas yükü Lamin Yamalın üzərindədir:
“Əsasən hər şey Yamaldan asılıdır. “Barselona”da yaxşı futbolçular var, amma Messi səviyyəsində dünya ulduzları yoxdur. Belə müdafiə ilə Çempionlar Liqasını qazanmaq? Heç vaxt! Bu, mümkün deyil. Çox qol buraxırlar. “İnter”lə yarımfinal oyunlarında bunu gördük. Yeddi qol buraxan komanda necə kubok qazana bilər? Deyəcəksiniz ki, altı qol da vurdular. Amma Yamalı çıxarsaq, “Barselona”da nə qalır? Hücum yaxşıdır, müdafiə isə yox. Sanki hər şeyi Yamala ümid ediblər”.
Peti əlavə edib ki, Yamal yaxın gələcəkdə komandanın lideri ola bilsə də, təkbaşına uğura çatdıra bilməz:
“Yamal təkbaşına Çempionlar Liqasını qazana bilməz. Messiyə böyük hörmətim var, amma o da Xavi, İnyesta, Puyol kimi adların dəstəyi olmadan bu turniri qazanmazdı”.
