İngiltərəli müdafiəçi DÇ-2026-nın isti havasından narahatdır

İngiltərə millisinin müdafiəçisi Ris Ceyms 2026-cı il Dünya Çempionatı zamanı ABŞ, Kanada və Meksikadakı isti hava şəraiti ilə bağlı narahatlığını ifadə edib.

Sport1.az xəbər verir ki, “Çelsi”nin 25 yaşlı futbolçusu ESPN-ə açıqlamasında oyunların başlanma saatının dəyişdirilməsini məqsədəuyğun sayıb.

Ceyms bildirib: “Matçların daha gec başlaması faydalı olardı, o vaxt nə bu qədər isti, nə də rütubətlidir. Mənim fikrim soruşulmayıb, amma yəqin ki, baş məşqçilərlə və klub nümayəndələri ilə məsləhətləşiblər. Belə şəraitdə futbol oynamaq çox çətindir, xüsusilə də İngiltərədə çıxış edən futbolçular üçün. Biz bu qədər istiyə öyrəşməmişik”.

O, əlavə edib ki, ABŞ-də iqlim şəraiti futbolçular üçün əlavə çətinlik yaradır: “Oteldən çıxan kimi bu istini hiss edirsən. Bu, oynamaq üçün çox ağır şəraitdir. Hətta meydanların keyfiyyəti də o vaxt yaxşı deyildi, bu da vəziyyəti bir qədər çətinləşdirirdi. Ümid edirəm ki, Dünya Çempionatı başlayana qədər hər şey qaydasına düşəcək”.

Qeyd edək ki, Ris Ceyms bu ilin iyun–iyul aylarında ABŞ-də keçirilən Klublararası Dünya Çempionatında “Çelsi”nin heyətində çıxış edib.