“Çelsi”nin ulduzunun evinə maskalı hücum
“Çelsi”nin yarımmüdafiəçisi Rahim Sterlinqin evi qarət olunmağa cəhd edilib.
Sport1.az xəbər verir ki, “The Telegraph”ın məlumatına görə, şənbə axşamı İngiltərənin Berkşir qraflığında yerləşən futbolçunun evinə naməlum şəxslər daxil olmağa çalışıblar. Hadisə zamanı 30 yaşlı futbolçu övladları ilə birlikdə evdə olub.
Sterlinqin nümayəndələri hadisəni təsdiqləyərək bildiriblər: “Rahim Sterlinqin evi bu həftəsonu oğrular tərəfindən hədəfə alınıb. O, həmin vaxt uşaqları ilə birlikdə evdə olub. Özəl həyatın və təhlükəsizliyin kobud şəkildə pozulmasına baxmayaraq, Rahim və ailəsinin salamat olduğunu təsdiqləyə bilərik. Bu çətin vaxtda onların şəxsi həyatına hörmətlə yanaşılmasını xahiş edirik”.
Qeyd edək ki, 2022-ci ilin dekabrında Qətərdə keçirilən DÇ zamanı Sterlinqin evi yenidən oğrular tərəfindən qarət olunmuşdu.
Hazırda futbolçu “Çelsi”nin heyətində çıxış etmir və baş məşqçi Enso Mareskanın qərarı ilə əsas komanda ilə birgə məşqlərə qatılmır.
