CEV prezidenti Bakı səfərinin məqsədini açıqlayıb

“Ölkənizin rəhbərliyinə məni belə xoş qəbul etdiyinə görə təşəkkür edirəm. Bu səfərində məhsuldar danışıqlarımız oldu”.

Sport1.az xəbər verir ki, bunu Avropa Voleybol Konfederasiyasının (CEV) prezidenti Roko Sikiriç jurnalistlərə açıqlamasında deyib.

O bildirib ki, qarşılarında əsas hədəf voleybolun inkişafıdır: “Biz də əlimizdən gələni edəcəyik ki, hər şey yüksək səviyyədə olsun. Qadın və kişi voleybolçular arasında Azərbaycan Yüksək Liqalarında final görüşləri çox maraqlı keçdi. Klassik voleybolla yanaşı, çimərlik voleybolunun inkişafı da önəmlidir. Bu istiqamətdə də müzakirələr apardıq”.

CEV prezidentinin sözlərinə görə, Azərbaycan klubları Çempionlar Liqasında iştirak etməyə layiqdir: “Ölkə reytinqinə görə klublar da bölünür. Ümid edirəm ki, növbəti illərdə Azərbaycan təmsilçiləri də bu yarışda iştirak edəcək".

Qeyd edək ki, Roko Sikiriç Bakıda final görüşlərini izləməklə yanaşı, bir sıra görüşlər keçirib.