Bu şirkət "Səbail"in sponsoru olmaq istəyir - ÖZƏL

I Liqanın iddialı klublarından olan "Səbail" yeni əməkdaşlıq müqaviləsi imzalamaq üzrədir.

Sport1.az-a daxil olan məlumata görə, "Aztürk Holding" paytaxt təmsilçisinin sponsoru olmaq niyyətindədir. Tərəflər arasında ilkin danışıq olub. Razılıq əldə olunarsa, şirkət klubun baş sponsoru olacaq.

Qeyd edək ki, "Aztürk Holding" hazırda Azərbaycanda innovativ texnologiyalar və nəhəng turizm layihələri ilə diqqət mərkəzinə gələn əsas qurumlardan birinə çevrilib. Şirkətin ən strateji təşəbbüsü olan "NeoOrdo" layihəsi çərçivəsində ölkədə irimiqyaslı Süni İntellekt fabrikinin qurulması və 36 hektarlıq ərazini əhatə edən müasir əyləncə-turizm kompleksinin inşası nəzərdə tutulur. Holdinqin rəhbəri Güləli Bağırovun rəhbərliyi ilə Çin mərkəzli texnologiya nəhəngləri ilə imzalanan əməkdaşlıq müqavilələri həm minlərlə yeni iş yerinin yaradılmasını, həm də ölkə iqtisadiyyatına xarici investisiyaların cəlbini hədəfləyir. Tikinti, logistika və səhiyyə kimi sahələrdə də fəaliyyət göstərən holdinq, dövlət büdcəsinə yük olmadan özəl sərmayələr hesabına Azərbaycanın texnoloji infrastrukturunu beynəlxalq standartlara çatdırmağı planlaşdırır.