“Milan” və “İnter” “San Siro”nun sahibi oldu – stadion söküləcək

İtaliyanın iki nəhəng klubu – “Milan” və “İnter” – “San Siro” stadionunu və ona bitişik ərazini rəsmi şəkildə Milan Bələdiyyəsindən satın alıblar.

Sport1.az xəbər verir ki, kkubların birgə açıqlamasında bildirilir ki, bu müqavilə şəhərin simvolik idman obyektinin gələcəyi üçün tarixi dönüş nöqtəsidir.

Məlumata görə, “Milan” və “İnter” mövcud stadionu tamamilə sökməyi və onun yerində dünya səviyyəli yeni arena inşa etməyi planlaşdırır. Layihə təkcə yeni stadion tikintisini deyil, həm də San Siro rayonunun yenidən canlandırılmasını və şəhərin idman-mədəni mərkəzinə çevrilməsini nəzərdə tutur.

Yeni kompleksin memarlıq layihəsini məşhur Foster + Partners və MANICA büroları hazırlayacaq. Stadionun beynəlxalq standartlara uyğun, ekoloji və müasir texnologiyalarla təchiz edilmiş “Milanın yeni memarlıq simvolu” olması planlaşdırılır.

Klubların açıqlamasında qeyd olunub:

“Yeni stadion və San Siro ərazisinin yenidən qurulması layihəsi Milan şəhəri və hər iki klub üçün yeni bir dövrün başlanğıcıdır. Bu addım “Milan” və “İnter”in uzunmüddətli idman və iqtisadi dayanıqlığa yönəlmiş birgə strategiyasını əks etdirir”.

Qeyd edək ki, “San Siro” 1926-cı ildə inşa edilib və son illər İtaliyada ən çox müzakirə olunan stadion layihələrindən biri olub.