Dünya birinciliyində 15-ci yer

Çinin Usi şəhərində keçirilən qılıncoynatma üzrə yeniyetmə və gənclərin dünya birinciliyində üçüncü yarış gününə yekun vurulub.

Sport1.az xəbər verir ki, gənc oğlan və qız sablyaçıların komanda yarışında qaliblər müəyyənləşib.

Rəsul Əliyev, Abbas Hüseynov, Timur Husnaddinov və Ayxan Xasıyevdən ibarət sablya üzrə millimiz ilk görüşdə Polşaya 41:45 hesabı ilə məğlub olaraq mübarizəni erkən dayandırıb. Oğlan sablyaçılarımız ümumi sıralamada 22-ci yerdə qərarlaşıb.

Fərəh Abasova, Leyla Əhmədova, Zərifə Hüseynova və Valentina Zeynalovadan ibarət sablya komandamız isə qızların komanda yarışında ilk görüşünü qalib başa vurub. Komandamız honkonqlu rəqiblərini 45:37 hesabı ilə məğlub edib. Ən güclü “səkkizliy”ə yüksəlmək uğrunda keçirilən qarşılaşmada Bolqarıstana 25:45 hesabı ilə uduzan yığmamız 9-16-cı yerlər uğrunda keçirilən görüşlərdə Çinə 28:45 hesabı ilə məğlub olub. Ardınca Misirə 31:45 hesabı ilə uduzan sablyaçılarımız sonuncu görüşdə Qazaxıstana 45:41 hesabı ilə qalib gələrək ümumi sıralamada 15-ci olub.

Qeyd edək ki, çempionata aprelin 15-də yekun vurulacaq.