Vətən Müharibəsi şəhidi adına klub yaradıldı – FOTO

Tərtər rayonunda Vətən Müharibəsi şəhidi Hacıyev Qubad Cəmil oğlunun xatirəsinin əbədiləşdirilməsi məqsədilə Azərbaycan Karate Federasiyasının təşəbbüsü ilə yeni karate klubu yaradılıb.

Sport1.az xəbər verir ki, ənənəvi karate fudokan üslubu üzrə fəaliyyət göstərəcək klubun təqdimatı Tərtər Rayon İcra Hakimiyyəti və Rayon Mədəniyyət Mərkəzinin birgə təşkilatçılığı ilə Mərkəzi Meydanda baş tutub. Təqdimat 31 Dekabr – Dünya Azərbaycanlılarının Həmrəyliyi Günü və Yeni Təqvim İlinin başlanmasına həsr olunmuş bayram konserti çərçivəsində keçirilib.

Tədbirdə Tərtər Rayon İcra Hakimiyyətinin başçısı Müstəqim Məmmədov, hüquq-mühafizə orqanlarının rəhbərləri, Yeni Azərbaycan Partiyası rayon təşkilatının və Ağsaqqallar Şurasının sədrləri, idarə, müəssisə və təşkilatların kollektivləri, inzibati ərazi dairələri üzrə nümayəndələr, bələdiyyə sədrləri, şəhid ailələri, qazilər, müharibə veteranları və rayon ictimaiyyətinin nümayəndələri iştirak ediblər.

Çıxışlar zamanı Vətən Müharibəsi şəhidlərinin əziz xatirəsinin daim uca tutulduğu, gənc nəslin vətənpərvərlik ruhunda tərbiyəsinin dövlət siyasətinin əsas istiqamətlərindən biri olduğu xüsusi vurğulanıb. Qeyd olunub ki, şəhidin adını daşıyan karate klubunun yaradılması həm idmanın inkişafına, həm də qəhrəman şəhidlərimizin xatirəsinin gələcək nəsillərə ötürülməsinə mühüm töhfə verir.

Bildirilib ki, Qubad Hacıyev adına “Fudokan Karate Klubu”nun rəhbəri məşqçi-müəllim Raqil Ağayevdir. Klubda yeniyetmə və gənclərin karate idman növünə cəlb edilməsi, sağlam həyat tərzinin təbliği, eləcə də idmançıların respublika və beynəlxalq yarışlara hazırlanması nəzərdə tutulur.

Yeni klubun yaradılması tədbir iştirakçıları tərəfindən razılıq və məmnunluqla qarşılanıb.