“Çelsi” əfsanəsindən maraqlı təklif

“Çelsi”nin sabiq kapitanı Con Terri klub rəhbərliyini braziliyalı müdafiəçi Tyaqo Silvanın komandaya qaytarılması variantını nəzərdən keçirməyə çağırıb.

Sport1.az xəbər verir ki, ingilis futbolunun əfsanəsi bu barədə Britaniya mətbuatına açıqlamasında danışıb. Onun sözlərinə görə, böyük təcrübəyə malik olan Tyaqo Silva hazırda azaddır və London klubu üçün faydalı fiqur ola bilər. Terri braziliyalı futbolçunun “Çelsi” ilə güclü bağlarının olduğunu, ailəsinin hələ də İngiltərədə yaşadığını və futbolçunun komandaya həm meydanda, həm də kənarda ciddi töhfə verə biləcəyini vurğulayıb.

Sabiq kapitan qeyd edib ki, Tyaqo Silvanın əsas heyətdə hər həftə oynaması şərt deyil, lakin onun təcrübəsi gənc futbolçular üçün böyük üstünlük ola bilər. Terri bu rolu 2017-ci ildə Antonio Kontenin rəhbərliyi altında çempionluq mövsümündə özü ilə müqayisə edib və Silvanın da kollektivdə əlaqələndirici fiqur kimi çıxış edə biləcəyini bildirib.

Terri açıqlamasında bunları deyib: “Tyaqo Silva hazırda əlçatandır. O, böyük təcrübəyə malik futbolçudur və klubumuzla münasibətləri əladır. Onun iki övladı akademiyamızda çıxış edir, ailəsi isə Londonda yaşayır. O, komandaya qayıtsa, həm meydanda, həm də paltardəyişmə otağında böyük fayda verə bilər”.

O, braziliyalı müdafiəçinin roluna da aydınlıq gətirib: “Mən demirəm ki, Tyaqo hər oyunda əsas heyətdə yer almalıdır. Amma onun təcrübəsi əvəzsizdir. 2017-ci ildə Antonio Kontenin dövründə mənim komandadakı rolum kimi — futbolçularla məşqçi heyəti arasında körpü ola bilər. Çətin anlarda nə demək və nə etmək lazım olduğunu çox yaxşı bilir”.

Terri sözlərini emosional şəkildə tamamlayıb: “Tyaqo Silvanın “Çelsi”yə qayıtması hamını xoşbəxt edər. Açığı, məni də. Bu sadəcə mənim fikrimdir”.

Xatırladaq ki, Tyaqo Silva 2020–2024-cü illərdə “Çelsi”nin formasını geyinib. O, London təmsilçisinin heyətində 155 oyuna çıxıb, 9 qol vurub, 5 məhsuldar ötürmə edib və Çempionlar Liqası, UEFA Superkuboku və Klublararası Dünya çempionluğu qazanıb.

Hazırda 41 yaşlı müdafiəçi Braziliyanın “Fluminense” klubunda çıxış edir. Cari mövsümdə o, bütün turnirlərdə 30 oyunda iştirak edib, 3 qol vurub və 1 məhsuldar ötürmə ilə yadda qalıb. Daha əvvəl futbolçunun ailəsinə yaxın olmaq üçün karyerasını Avropada başa vurmaq istədiyi ilə bağlı xəbərlər yayılmışdı.