“Çelsi”nin iki müdafiəçisi A Seriyasında çıxış edə bilər

“Fiorentina” “Çelsi”nin iki müdafiəçisini transfer hədəfinə alıb

Sport1.az xəbər verir ki, A Seriyası təmsilçisi London klubunda çıxış edən iki futbolçu ilə maraqlanır. Məlumata görə, “bənövşəyilər” 19 yaşlı mərkəz müdafiəçisi Coş Açemponqu mövsümün sonunadək icarəyə götürmək və müqaviləsinə satınalma bəndi əlavə etmək niyyətindədir. Gənc oyunçu da “Çelsi”dən ayrılmağa müsbət yanaşır.

Florensiya klubu həmçinin 27 yaşlı digər mərkəz müdafiəçisi Aksel Disasinin də durumunu yaxından izləyir. Təcrübəli oyunçu bu mövsüm əsas komandada şans qazanmır və onun gələcəyi də qeyri-müəyyəndir.

Qeyd edək ki, Açemponqu cari mövsümdə bütün turnirlərdə 8 dəfə meydana çıxıb və 1 qol vurub. Hər iki futbolçunun “Çelsi” ilə müqaviləsi 2029-cu ilə qədərdir. “Transfermarkt” Açemponqu 15 milyon avro, Disasini isə 18 milyon avro dəyərində qiymətləndirir.