“Etihad”da yubiley – Qvardiolanın 1000-ci matçı qələbə ilə tamamlandı

“Mançester Siti”nin baş məşqçisi Xosep Qvardiola məşqçilik karyerasında 1000-ci oyununa çıxıb.

Sport1.az xəbər verir ki, bu əlamətdar göstərici Premyer Liqanın XI turunda “Liverpul”la keçirilən oyuna təsadüf edib. “Etihad” stadionunda baş tutan qarşılaşmada “şəhərlilər” rəqibini 3:0 hesabı ilə məğlub ediblər. Komandanın qollarını Erlinq Haaland, Niko Qonsales və Jeremi Doku vurublar.

Qvardiola karyerası ərzində üç nəhəng klubda – “Barselona”, “Bavariya” və “Mançester Siti”də çalışıb. O, katalonlarla üç dəfə La Liqa çempionu olub, iki dəfə ölkə kubokunu və üç dəfə Superkuboku qazanıb. Həmçinin iki dəfə Çempionlar Liqasının, UEFA Superkubokunun və Klublararası Dünya Çempionatının qalibi adını əldə edib.

“Bavariya”nın sükanı arxasında olduğu dövrdə də uğurlarını davam etdirən mütəxəssis Münhen təmsilçisi ilə üçqat Almaniya çempionu olub, iki dəfə ölkə kubokunu, eləcə də UEFA Superkubokunu və Klublararası Dünya Çempionatını qazanıb.

“Mançester Siti”də isə Qvardiola altı dəfə Premyer Liqa çempionluğu, iki dəfə ölkə kuboku, dörd dəfə Liqa kuboku və üç dəfə Superkubok əldə edib. Bundan əlavə, “şəhərlilər” onun rəhbərliyi altında Çempionlar Liqasının, UEFA Superkubokunun və Klublararası Dünya Çempionatının qalibi olub.