FİDE reytinqi: Beş şahmatçımız gerilədi

FİDE şahmatçıların aprel üçün dünya reytinqini dərc edib.

Sport1.az xəbər verir ki, siyahıda Azərbaycanın 7 şahmatçısı “Top-100”də yer alıb.

Kişi şahmatçılarından ən yaxşı göstəriciyə Şəhriyar Məmmədyarov malikdir. Qrossmeysterimiz 2748 xalla 13-cü yerdə qərarlaşıb. Teymur Rəcəbov (2692) 39-cu sırada yer alıb. Rauf Məmmədov (2657) 69-cudur. Hər üç şahmatçımız geriləyib. Şəhriyarla Rauf 2, Teymur 4 pillə geri düşüb.

Cədvələ 2837 xalla norveçli Maqnus Karlsen başçılıq edir.

Qadınların cədvəlində ən yaxşı təmsilçimiz Gövhər Beydullayeva (2400) 45-ci, Günay Məmmədzadə (2390) 53-cüdür. Hər iki şahmatçımız 2 pillə geriləyib. Ülviyyə Fətəliyeva (2387) 57-ci, Xanım Balacayeva (2358) 85-ci pilləni qoruyub.

Qadınların reytinq cədvəlinə çinli Yifan Hou başçılıq edir – 2633 xal.