AFFA işçi tapa bilmir - KÖŞƏ

Susqunluqdur.

Uzun müddətdir ki, AFFA-dan səs-soraq yoxdur. Nə strategiyadan, nə də Ayxan Abbasovun müqaviləsinin detallarından xəbər var. Belə getsə, hər iki işin müddəti bitəcək. Amma AFFA bu məsələlərlə bağlı rəsmi nəsə açıqlamayacaq.

Qurum səssiz-səmirsiz yenilənmə siyasəti həyata keçirir. Həm ətraflarına adam toplamağa çalışırlar. Həm də yeni əməkdaşlarla güclənmək istəyirlər. Amma heç kim AFFA-nın təklifini ciddiyə almır, qəbul etmir.

Məsələn, qurum yeni - Kommunikasiya departamenti yaratmaq arzusundadır. Buranı idarə etməyə şəxs axtarırlar. Amma tapa bilmirlər. Bizdə olan məlumata görə, bir müddət öncə Premyer Liqa klublarının birində çalışmış kişi həmkarlarımızdan biri federasiyanın iş təklifini rədd edib.

Qəribə gəldi? Niyə iş təklif edilən şəxsin kişi olduğunu xüsusi vurğuladım? Yox, cinsi ayrı-seçkilik etmirəm. Çünki AFFA rəsmiləri başqa federasiyada çalışan xanım həmkarımıza da bu postu həvalə etmək istəyib. Amma o da bu təklifi mədəni şəkildə rədd edib.

Bu şəxslərin adları bizə məlumdur. İstənilən zaman açıqlaya da bilərik. Lakin işlədikləri yerlərdə problem yaşamasınlar deyə bu addımı atmırıq.

Qayıdaq əsas məsələyə. Əvvəllər AFFA-da çalışmaq bütün jurnalistlərin, federasiya nümayəndələrinin əsas istəklərindən idi. Hətta Gənclər və İdman nazirliyində yüksək vəzifədə olan şəxslər bu qurumda işləməyə can atırdılar. İndi AFFA-nı nə günə qoyublarsa, heç kim bu qurumu ciddiyə almır. Heç kim burada işləmək istəmir. Heç adının bir çəkilməsini belə arzulamırlar. Bu da futbolumuzun başbilənlərinin strategiyasının nəticəsi.

İLKİN SULTANLI