“Lənkəran” baş məşqçisi: “Bir az daha dəqiqlik olsaydı, nəticə fərqli olardı”

“Rəqib bərbad top itkilərimizdən sonra fərqlənib irəli çıxdı”.

Sport1.az xəbər verir ki, bunu “Lənkəran” klubunun baş məşqçisi Georgi Kondruseviç Azərbaycan Basketbol Liqasının V turunda “Ordu” ilə oyundan sonra komandanın mətbuat xidmətinə açıqlamasında deyib.

O, məğlubiyyətin səbəbləri haqqında danışıb:

“Qarşıya qoyulan tapşırıqları qismən deyil, tam şəkildə yerinə yetirsəydik, oyun fərqli nəticələnə bilərdi. O zaman bu cür rəqibə qarşı daha yaxşı oynamaq şansımız olardı. Rəqib bərbad top itkilərimizdən sonra fərqlənib irəli çıxdı. Çox top itkilərinə yol verdik və ilk hissədə hücumdakı oyunumuzu dəyişə bilmədik.

Zədələnmiş oyunçularımızın çatışmazlığı hiss olundu və bu, xüsusilə dördüncü hissədə özünü göstərdi. Hazırda zədə problemi yaşayırıq, bu da tam təlim-məşq toplanışı keçə bilməməyimizin nəticəsidir. Buna baxmayaraq işimizi davam etdirəcəyik”.

Qeyd edək ki, “Ordu” “Lənkəran”la görüşdə 91:79 hesablı qələbə qazanıb.