Turnirin final matçı "Qarabağ"ın oyununun yerinin dəyişdirilməsinə səbəb oldu

Misli Premyer Liqasında VII turun proqramında III MDB Oyunları ilə əlaqədar dəyişiklik edilib.

Sport1.az-ın Peşəkar Futbol Liqasının rəsmi saytına istinadən məlumatına görə, oktyabrın 4-də Qəbələ şəhər stadionunda keçirilməli olan "Kəpəz" - "Qarabağ" matçı "Azersun Arena"ya təyin edilib.

MDB Oyunlarında futbol üzrə final matçı məhz eyni tarixdə Qəbələdəki əsas meydançada təşkil olunacaq. Ona görə də I dövrənin “Kəpəz – Qarabağ” oyunu ilə III dövrənin “Qarabağ” – “Kəpəz” oyunlarının yeri dəyişdirilib.

Beləliklə, Gəncə şəhər stadionu qış fasiləsindən sonra "Kəpəz"in ixtiyarına verilsə, yerli komanda XXV turun bu oyununu öz doğma arenasında keçirəcək. Təqvimə əsasən, həmin tur 20 - 22 martda gerçəkləşməlidir.

Qeyd edək ki, "Qarabağ" - "Kəpəz" oyunu saat 17:00-da başlanacaq.

MİKAYIL HACIYEV