"Məşqçi bütün kollektivə cavabdeh olmalıdır" - Vurğun Hüseynov

Misli Premyer Liqasının 35-ci turunda "Sumqayıt" "Turan Tovuz"a məğlub oldu - 0:1.

Sport1.az xəbər verir ki, oyundan sonra meydan sahiblərinin məşqçisi Vurğun Hüseynov mətbuat konfransında iştirak etdi.

Mütəxəssis görüş haqda bunları söylədi:

"Hələ ki özümü məşqçi hesab etmirəm. Biz özümüzü məşqçi hesab etsək, neçə illərdir nəticə qazanan məşqçilərə hörmətsizlik etmiş olarıq. Vüqar Mustafayev karyerasını başa vurdu. Ona ən xoş arzularımı çatdırıram. Biz demək olar ki, heç nə etməmişdik. Futbolçular sağ olsunlar, meydana çıxıb özləri oynadılar. Sonuncu ev oyunumuz idi. Azarkeşlərə yaxşı nəticə hədiyyə etmək istəyirdik. Amma olmadı".

- Baş məşqçi olmaq istəyərsiz?
- Neçə il futbol oynamışam. Amma məşqçilik tam başqa bir şeydir. Həqiqətən çox çətindir. Futbol oynamağa nə var ki? Məşqçi bütün kollektivə cavabdeh olmalıdır. Bunun üçün böyük təcrübə lazımdır. Məşqçi ola bilməsəm, başqa sahəyə yönələcəyəm.

- Məğlubiyyətin səbəbi nə idi? Vaqif Cavadovun gedişi komandaya necə təsir etmişdi?
- Vaqif müəllimə uğurlar arzulayıram. Məşqçi işi belədir. Bu gün işləyirsən, sabah işləmirsən. Futbolçular peşəkardır. Onların üzərinə düşən odur ki, meydana çıxıb mübarizə aparsınlar.